|
رد: فلســـــــطين بعيــــون جدتــي
نكمل حديثنا مع الجده الغاليه و نفتح ملف الاعراس و الافراح : س _ نريد من جدتنا ان تلكمنا عن اولى خطوات العرس ... ج _ ( يا ستي بقى الكبير هو الي تمشي كلمته و هو الي يقرر انه بدو يخطب بنت فلان لابنه و ابنه يقول مليح و شو ما قال ابوه او سيده يقول انا موافق و مبسوط ... و بعدها يا ستي يحضروا للفرح و كل البلد تبقى مبسوطه كانه عرس للجميع .... و في كل دار ... بقى اول يوم اسمه " الحنى " تروح النسوان " فارده " من دار العريس لدار العروس و الفارده هي النسوان الي بتطلع من دار العريس لدار العروس و بتحمل معها الحنى و الذهب و بتغني طول الطريق وبتقول : هي يا حماله الفرد طخي لفوق ... و هاد الحكي بقى في الليل بعد صلاة العشا مش بالنهار و بقى فش كهربا بقينا نوخذ معنا شمع و ضو على الكاز و يجي معنا زلمي او اكثر مشان الدنيا ليل و بخافوا لا يسير اشي على الطريق ... |
رد: فلســـــــطين بعيــــون جدتــي
( و نوصل يا ستي لدار اهل العروس و هناك نغني و نهني و نقول : جيت اغني و اهني منشان امو و احط الرايه الخضره على كمه جيت اغني و اهني منشان اخته و احط الرايه البيضه على تخته جيت اغني و اهني منشان عمتو و احط الرايه البيضه على كتفو و بقينا نظل نغني للعريس و لاهله و للعروس لاهلها و نزغرد و نقول : ها وي ها صلي على محمــــــــــد ها وي ها صلاة بصلاتيـــــــــــــــــن ها وي ها صلاة ترد العيــــــــــــــــن ها وي و صلاة تحفظ العرساــــــــــــــــــــن |
رد: فلســـــــطين بعيــــون جدتــي
و بعدها يا ستي نحني العروس و نوزع باقي الحنى على الناس الي حاضرين .... و يقولوا اهل العروس عن حالهم : ها وي ها احنا ان اتجوزنا يا هالناــــــــــــــــــــــــــــــــس ها وي ها احنا ان اتجوزنا نرفع الراــــــــــــــــــــــــــــــــــس ها وي ها احنا ان اتجوزنا على صيت اهلنـــــــــــــــــــــا ها وي ها و صيت اهلنا واصل لعماــــــــــــــــــــــــــــــــــــن و بعدها يا ستي نروح على دار العريس و نقعد نحضر بالطبيخ لثاني يوم و نقول لابو العريس : ها وي ها يا ابو فلان لا تندم على الي صـــــــــــــــــار ها وي ها اذبح الذبايح و اهيل الرز بالقنطــــــــــــــار ها وي ها اذبح ذبايح و اعزمنــــــــــــــــــــــــــــــــــــــــ ـا ها وي ها و اذبح ذبايح لا تعدهن ذلياــــــــــــــــــــــــت و بهذيك الايام بقى فش لا كهرباء و لا غاز و لا غيره بقينا نطبخ كل طبيخ العرس على نار الحطب و نظل طول الليل نجيب مية من العين و كل نسوان العيله و الحاره و البلد يشاركن في الطبيخ كل الليل .... |
رد: فلســـــــطين بعيــــون جدتــي
و بالنسبه للرجال : بقوا بليلة الحنى يعملوا حفله الهم لوحدهم و يغنوا و فيها و ما شاء الله و يدبكوا و يجي كل اهل البلد ...و يعملوا عشى يعشوا الناس و طبعا بقى فش طباخين بقين النسوان يعملن الاكل كلوا ... و ثاني يوم يحطوا العريس على الخيل و يزفوا في كل شوارع البلد و يغنوا اغاني العرس ... |
رد: فلســـــــطين بعيــــون جدتــي
بيوم العرس يجي كل الناس على دار العريس و بعد الظهر يتغدو الحاضرين الاكل الي طبخنوا النسوان .... و بعدها يروحوا على دار العروس يجيبوها على بيت العريس .... و يقولن : ها وي ها صلي على محمــد ها وي ها على فاطمه بنتــو ها وي ها الف الحمد لك يا ربـــي ها وي ها لي طلبتو نلتـو ها وي ها طليتني اقول يا جبار ها وي ها حتى طلع القمر و الميزان ها وي ها الف الحمد الك يا ربـي ها وي ها الي طلبتو صار ها وي ها صلي على محمـد ها وي ها حتى تلين الحديده ها وي ها فرح مبارك ها وي ها و العين عنه بعيده ها وي ها يا صرلي 12 سنه حزينـه ها وي ها و بعلمكم يا جيران ها وي ها اليوم قلبي فرح ها وي ها من زمان ما فرح |
رد: فلســـــــطين بعيــــون جدتــي
( بقت النسوان لما تيجي على بيت العريس تهني اهل العريس و تقول : ها وي ها يا دار ابو فلان السعد يواريهـــــا ها وي ها يا خضره جواكيرها و بيض علاليهـــــــا ها وي ها ياكل الاجوايد تصابحها و تماسيهــــا ها وي ها كل الاجاويد تشرب من قهاويهـــــا و بقين يا ستي يهنين ام العريس و يقلن : ها وي ها يا ام العريس اهنيك اهينــــكِ ها وي ها انا جاي اهنيــــــكِ ها وي ها و الحمد لله جوزتي ابنـــــكِ ها وي ها و ما حدا اشتفى بيِــــــــكِ |
رد: فلســـــــطين بعيــــون جدتــي
في آخر النهار يرحوا اهل العريس يجيبوا العروس من بيت اهلها ... و لما بقى فش سيارات بقوا يجيبوا العروس على الجمل او على الخيل ..من بلد لبلد او من بيت لبيت في نفس البلد ...
و لما يفوتن النسوان على بيت العروس و قبل ما تطلع من البيت على بيت العريس يقولن للعروس : ها وي ها قومي على حيلك و خلي الي تموت تموت ها و يها يا حماله شجرة المنتهى و الياقوت ها وي ها و احنا من بيت اصلنا مثبوت ها وي ها و اصل اهلنا بالتابوت و لما يا ستي تيجي العروس على بيت العريس يقلن للعروس : ها وي ها و مبروكي يا عروس يا جديده ها وي ها مبروكي على كل العيلـه ها وي ها مبروكي و قادامك خير ها وي ها الارض اليابسه تخضر قدامك و يقلن للعريس في بيته : ها وي ها شفت صفت التتن بيدك ها وي ها طلبت من الله ينطي و يزيده ها وي ها يسير حاكم و كل الناس تحت ايده |
رد: فلســـــــطين بعيــــون جدتــي
كانت هذه لمحه عامه عن العرس الفلسطيني و كانت تلك بعض امثله من المهاهاة الفلسطينيه ..... و لدينا مزيد من حديث جدتنا ان شاء الله تعالى ...... |
رد: فلســـــــطين بعيــــون جدتــي
يعطيكِ العافية روز على هالكنز التراثي ..
احلى اغاني واحلى مهاهاة ..الاغاني التراثية الفلسطينية والتي نتميز فيها والتي بدأت بالانثار للاسف . نتمنى ان نحافظ عليها ونستمر في غنائها باعراسنا . وبانتظار بقية حديثك الشيق .. |
رد: فلســـــــطين بعيــــون جدتــي
الله يعافي قلبك خالتي ام زيد
نورتي نكمل نتحدث اليوم مع الجده بإذن الله عن الهجره و الجهاد و المقاومه ... س _ كيف كان شعور الاهالي عندما جاء الانجليز الى الارض الفلسطينيه و احتلوها ج _ ( والله كل كلمه بتنقال ما بتوصف هذاك الشعور .. يا ستي الارض هي العرض .. فش أجمل من انو الواحد يحافظ على ارضه و يزرعها و يحصدها و يفلحها .. الارض مثل الولد ما بتفرق عنو اشي هاذ عزيز و هاي عزيزه .. الي بزرع الارض و بتعب عليها بعرف قيمتها و الي بزرع شجره و بسقيها ببقى عارف انها زي ابنو ) .. |
| الساعة الآن 10:21 AM بتوقيت العيساوية |
Powered by vBulletin® Copyright ©2000 - 2024, Jelsoft Enterprises Ltd. Designed & TranZ By
Almuhajir
جميع الحقوق محفوظة لمنتديات العيساوية...المشاركات والمواضيع في منتديات العيساوية لا تعبر بالضرورة عن رأي إدارته بل تمثل وجهة نظر كاتبها
All participants & topics in forum esawiah.com
does not necessarily express the opinion of its administration, but it's just represent the viewpoint of its author