بسم الله الرحمن الرحيم
السلام عليكم و رحمة الله و بركاته
الحلقة الخامسة
أبو عجيب : شو هاذ ؟ يعني المرض ما تذكـّرني إلا في رمضان !
أم عجيب : سلامتك
أبو عجيب : سلامتي شو بدّك فيها كمان سلامتي بدّك تاخذيها !
ما كلـّه منكم هو إنتو خلـّيتو عندي سلامة
أم عجيب : شو أفطرت !؟!؟!؟!؟!
أبو عجيب : ها و لـّلا , شو مش شافيتيني مرمي زي البسكوتة المبلولة بالشاي , روحي جيبي لي بسكوتة مع شاي
أم عجيب : بس شاطر تتأمـّر , عمايلك مثل الاولاد الصغار
أبو عجيب : شو ها البلا عيـّان و مرتي بتفقـّع فيّ
آه يا راسي إن شاء الله الوجع اللي براسي يصير براسكو كلكو
و اقعد أضحك عليكو زي البسّة الماسكة فار مدروَخ و بتتسلـّى فيه
عجيبة : مالك يابا ؟
أبو عجيب : أبوكي عيـّان و لا حد معبـّره , شو رايك تجيبي لي شي أشرب شاي ولـّلا شي آكله
عجيبة : بَس الدنيا رمضان !
أبو عجيب : شو رمضان ! مش شايفة أبوكي زي البطاطا المسلوقة ؟! أمـّا عيلة ****
الوجه الآخر
أبو عجيب : الحمد لله , إن شاء الله طهور و كفـّارة .
كيـّف يا أبو عجيب فرصة حلوة في رمضان تكون عيـّان والأجر إن شاء الله مضاعف , لعلّ الله يغفر لنا ويسامحنا على التقصير الرهيب بحقـّه
أم عجيب : شايفتك تعبان , ليش ما تفطر ؟
أبوعجيب :له يا بنت الحلال , هاذ رمضان , بنستنـّاه من السنة لـَلسنة , و بعدين شوية رشح ما بضرّوا
عجيبة : سلامتك بابا , بقدر أساعدك بأي شي ؟
أبو عجيب : تسلمي لي يا غالية يا بنت الغالية , يا عيني على الأدب و الأخلاق , اللهم لك الحمدعلى هذي العيلة الطيبة
شوية رشح و سخونة جمعت العيلة حولي
عجيب : يا ريت الوجع في راسي يابا
أبو عجيب : لا يا حبيبي سلامتك و لا ترى شر
عجيب : طب أنا بعرف أنـّه ليس على المريض حرج , ليش ما تفطر ؟
أبو عجيب : الله يسعدك يا سندي , شوية رشح يا حبيبي ما بتضايق
إنت ما بتعرف انـّه المرض نعمة
عجيب و عجيبة : كيف ؟!
أبوعجيب :هالحين لو كان عليكم وظيفة بيتية و الأستاذ قال اللي بحل الوظيفة إلـُه علامة و اللي بضيف معلومة صغيرة مع الإجابة إلـُه علامة إضافية ,شو بتسوّا ؟
عجيب : بحل وبضيف عشان آخذ علامات أكبر بدون جهد كبير
أبوعجيب : و لوكنت أنا في الشغل و قاللي المسئول إذا بتفتح الشبابيك كل يوم الصبح وبتتأكـّد من تسكيرها آخر النهار وبعطيك زيادة , شو بتنصحوني ؟
عجيبة : طبعا ً تقبل لأنك هيك هيك موجود ومش راح يضرّك بالعكس بتكسب زيادة
أبو عجيب : الله سبحانه و تعالى أكرمنا برمضان و أعطاني مَهمـّة زيادة هي الصبر على المرض وعليها زيادة أجر , شو رأيكم ؟ بالإضافة إنـّه الله عزّ و جلّ بيغفر الذنوب و بيطهـّر الإنسان و بيرفع درجته بالمرض و بجدد له جسمه بعد المرض
بالله عليكم في أكرم من الله ؟!
والمريض بمَرض صعب مسموح له يفطر بقدر يعني يشرب الدوا و شوية مي أو اللي بيطلبه الدكتور و ممنوع عليه يتصرف زي ما بدّه وياكل ويشرب قدّام الكل على خاطره
إسمعوا هالنكته عشان نضحكلنا شوي
مرة واحد عيـّان راح على الدكتور و قال له يادكتور كل ما بشرب الدوا عيني بتوجـّعني
قال له الدكتور مش معقول فرجيني كيف بتشرب الدوا !
قام العيـّان حط معلقة من الدوا في كاسة مي زي ما قل له الدكتور من قبل و شرب
طبعا ً من فصاحته كان يترك المعلقة في الكاسة و لمـّا بشرب بتضرب المعلقة بعينه
اللهم صل ِ و سلم و بارك على الحبيب سيدنا محمد
وعلى آله و أصحابه أجمعين