[أبوالنون]

بسم الله الرحمن الرحيم
السلام عليكم و رحمة الله و بركاته

الحلقة الحادية عشر

أبو عجيب : ياه قرّب رمضان يخلـّص , لازم نطلع صدقة الفطر
أنا عارف أصلا ً إحنا لازم يعطونا من صدقة الفطر مش ياخذوا منـّا
عجيبة : يابا , عجيب مفطر و عامل حاله صايم
أبو عجيب : وينه هالغضيب ؟ بدّي أكسـّرله عظامه و إن شاء الله عمره ما بطيب
أم عجيب : لأ الولد صايم , ما تضربه
أبو عجيب : صوم الكلاب , بدّي أفرمه و أخلـّي زي الـّلي طالع عليه طرك قلاّب
تعال هون يا مفطر بتضحك على مين ؟ خوذ , و خوذ
ولك مش عارف إنـّه الصوم بعلـّم الصبر بدّي أخلـّيك عبرة للـّي بيعتبر والـّلي ما بيعتبر
أم عجيب : إلحقونا يا ناس , راح الولد فغيص
إتركه يا مجرم طحنته
عجيب : والله صايم , صايم يابا من شان الله
أبو عجيب : من شان الله بدّي أفرمك فرم و أخلـّيك مثل برادة القلم
أم عجيب: وينك يا أبوالنون شو هاذ ؟!
وينكوا يا أهل الخير مات الولد مات الولد
ولمين بدّي أشكي ما قبله مات الولد و ألف ولد
و يهرب عجيب مكسـّر الأضلاع و يبتعد عن البيت
عجيب : إذا أبوي هيذ بسوّي
طيـّب إذا بيجيني ولد بدّي أنتقم منـّه و إذا بصوم بدّي أطحـّن راسه , ياويله إذا بصوم , ممنوع الصيام وجكارة في بدّي أدخـّن كمان و أعزف على أوجاع هبّوب الصغير أحلى الألحان
مين هبّوب ؟ ما حد يحكي لأبوي إنـّي قلتلكم أسمه
و يا ويلك يا هبّوب بدّي أطحنك مثل الحبوب

الوجه الآخر

أبو عجيب : شو يا أم الحبايب وصـّلتي الأمانة ؟
أم عجيب : أكيد , بس مش عارفه ليش هالقد بدري
أبو عجيب : شو بدري يا بنت الحلال الله يسامحك ؟
خلـّي الناس تتبحبح و تشتري الـّلي بدها ايـّاه من هالحين
أم عجيب : صدقني يمكن إحنا أبدى بهالمصاري من غيرنا
و حنا لازم يعطونا من زكاة الفطر مش ياخذوا منـّا !
أبو عجيب : له يا بنت الحلال , الحمد لله الخير موجود و الله كريم راح يعوّضنا أحسن و أحسن , بعدين شو ناقصنا !؟
و حتى ولو كنـّا على قد الحال مثل ما بيقولوا , من أجمل ما في صدقة الفطر إنـّه الله سبحانه أعطى للـّي مثلنا و الـّلي أقل منـّا فرصة العطاء , إنـّه الواحد يعطي شعور كثير حلو
عجيبة : بابا عجيب مفطر
أبو عجيب يلتزم الصمت
عجيبة : ماما عجيب مفطر ليش ما بتردّوا عليّ ؟
أم عجيب : لازم تعرفي إنـّه أبوكي لمـّا ما برد بكون بدّوش يرد
و تعالي معي على الغرفة بحكيلك ليش بدّوش يرد
عجيب : بابا أنا صايم
أبو عجيب : ماشي بس المهم تعرف إنـّه الكذب يا حبيب مشكلة أكبر من أي مشكلة ثانية
أهم شي ما تكذب , و أنا مصدقك , المهم إنت تصدُق نفسك لأنـّه ربـّك شايفك يا غالي
عجيب : أنا ما كنت بدّي أفطر , نسيت وأكلت
أبو عجيب : إذا نسيت عنجد فما عليك أي مشكلة كمـّل صيامك
و أهم شي تظل صادق مع نفسك

اللهم صل ِ و سلم و بارك على الحبيب سيدنا محمد

وعلى آله و أصحابه أجمعين