بسم الله الرحمن الرحيم
السلام عليكم و رحمة الله و بركاته
الحلقة الثانية عشر
أبو عجيب : شو هالصباح المعفـّن ! ليش هالمخفي أبو غريب بيمشي وين سيـّارته , بس ما يوقـّفني و يركب معي إف
ما بينفع , قردين بكيس بنصير فغيص
خلـّيني أعمل حالي مش شايفه و أنفد بجلدي منـّه و من لساني
أصلا ً أنا و هو لساناتنا ما أسخم من جدّي إلا جدتي
و بالفعل يستطيع أبو عجيب التهرّب من أبي غريب
و عندما يصل إلى عمله
أبو عجيب : صباح السَعـَدين على الناس المليانين
أبو مـُريب ( زميل أبي عجيب في العمل ) : الله لا يجيب الغلا , وين يا سيّد شمسك عالية كثير اليوم , روح تلقّى وعدك المدير بدّه ايـّاك
أبو عجيب : مسكين يا أبو عجيب هربت من الشتا للمزاريب
خلصت من المخفي أجاني المضوي و هي الخالص أبو تعـّيب زيادة البيـّاع
أبو تعـّيب : ما تكثـّر حكي فاضي بكفي منظرك مثل القرد اللي رايح عالقاضي و روح تلقـّى قضاك المدير ألف مرّة إلا مرّة سأل عنـّك
أبو عجيب : و ليش إلا مرّة !؟
أبو تعـّيب : عشان ما يحطـّوك بكتاب جينيس لأني مرشح فيه لشي ثاني
أبو مـُريب : و شو الشي الثاني يا عيون سعداني ؟
أبو تعـّيب : الرقم القياسي في ثقالة الدّم و وساخة اللسان
و إلك يا روح قطة جيرانـّا الجربانة برشحك للرقم القياسي في حشر الأنف , ما بكفي مرشّح روح حل عنـّا
الوجه الآخر
أبو عجيب : الله الله , الحمد لله حسنات بتمشي على الأرض
خير يا جارنا العزيز ؟ ليش ماشي وين سيـّارتك !؟
أبو غريب : الله يسعد هالصباح , هلا بجار الرضا , سيارتي عند الميكانيكي و اليوم بعد الظهر رايح أخذها
أبو عجيب : شو بتستنّا ؟ بسرعة تفـضـّل اركب
و عندما وصل أبو عجيب إلى العمل
أبو عجيب : صباح فتـّاح , أسعد الله أوقاتكم و بنور الإيمان أنار حياتكم
أبو مـُريب : الله ما يحرمنا هالصباح النـّدي , خير إن شاء الله ليش تأخـّرت ؟ مش عادتك !
أبو عجيب : خلـّيها مستورة , الله يعينـّا إسأل أبو ديع بقول لك
أبو مـُريب : مين أبو وديع !؟
أبو عجيب : له يا رجل هو في حد في البلد ما بيعرف مين أبو وديع !!! هيك بتزعـّلني منـّك !
أبو مـُريب : إن شاء الله ما بصير أي زعل
أبو عجيب : أهلا ً بحبيبنا أبو تعـّيب
أبو تعـّيب : صباحك معطـّر و بنور الحبيب المصطفى عليه السلام منوّر , أخي أبو عجيب لو سمحت المدير بدّه ايـّاك
انا قلت له إنـّك على الطريق و بالعادة ما بتتأخـّر
أبو عجيب : تسلم
و عندما عاد أبو عجيب من العمل و أثناء قيادته للسيارة اكتشف أن أحد العجلات به ثقب و قد فرغ من الهواء
أبو عجيب : الحمد لله الذي لا يـُحمد على مكروه سواه , الله يبارك لك يا أبو العجلات أجتك رزقة
أبو غريب : السلام عليكم , شو يا أبو الحبايب مال السيـّارة ؟
أبو عجيب : مثل ما انت شايف يا طيّب , المشكلة إنـّي نسيت مفتاح العجلات في الدار
أبو غريب : خلـّي عنـّك أنا بسوّيه
أبو عجيب : بس إذا بتتكرّم تعطيني المفتاح من عندك و أنا بسوّيه , بدّيش أغلبك
أبو غريب : لا و الله ما حد بسوّيه إلا أنا , غلبـَتـَك راحة , بدنا خدمة تحرز
اللهم صل ِ و سلم و بارك على الحبيب سيدنا محمد
وعلى آله و أصحابه أجمعين