[همس الليل]

الام

قصيدتي زاد بعيوني جمالها
واخذت أنقي بالمعاني جزالها
واكتب معانيها من الشوق والغلا
لأمي وأنا اصغر شاعر ٍمن عيالها

كتبتها في غربتي يوم رحلتي
لما طرالي بالسفر ماطرالها
امي وانا بوصف لها زود حبها
وان ماحكيت لها قصيدي حكالها
امي لها بالقلب والجوف منزله
مكانة ماكل محبوب نالها
اقرب من ظلالي وانا وسط غربتي
وانا تراي اقرب لها من ظلالها
ماشافت اعيوني من الناس غيرها
ولا خلق رب الخلايق مثالها
اغلا بشر في جملة الناس كلهم
واكرم من ايدين المزون وهمالها
اتبع رضاها ورتجي زود قربها
واللي طلبته من حياتي وصالها
الصدق مرساها والاشواق بحرها
والعطف واحساس الغلا راس مالها
اهيم فيها وابتسم يوم قلبها
يسأل وانا قلبي يجاوب سؤالها
وان اطلبتني شي فزيت مندفع
اموت أنا واحمل تعبها بدالها
واصبر على الدنيا والاحزان والتعب
واحمل على متني فطاحل جبالها
واسهر اعذب راحة القلب بالشقا
واعيش اعاني بس يرتاح بالها
تربية ابوي اللي على الطيب بذكرة
اللي وهبني الحياه ومجالها
نور لي ادروبي وانا طفل مبتدي
حتى تركني واحد من رجالها
الوالدين اولى بالاحسان لجلهم
وأولى بتكريم النفوس وعدلها
اقولها وانا على الله متكل
والله عليم بقدرتي واحتمالها
ياكلمة اغلى من الناس كلهم
ياشمس بقلبي بعيد زوالها
يافرحة تملي لي الكون باكمله
ياشجرة تكبر ويكبر ظلالها
تضحك لي الدنيا ليا شفت زولها
مثل السما تزها بطلة هلالها
والبعد عنها ياهل العرف ماقدره
لاشك ناري زايدة بشتعالها
ماعيش ببلاد ولاهيب بأرضاها
ولابي عيوني كان ماهي قبالها
أرض ٍ تدوس امي بالاقدام رملها
اموت فيها واندفن في رمالها





الاسطوره

ماتقبلت الفراق ما ليدي فيه حيله
آه لو ان الظروف المقبله تكشف قدرها



لو يعرف الشخص منّا وش مع الغيب ابيجي له
كان جنبنا المشاكل من قبل يوقع ضررها



ما هقيت الليله اللي جابت الفرقا طويله
لين صارت ليلة امس بعيني اطول من شهرها



والعذاب اللي يذوب بعين من يفقد خليله
عندي اكبر من عذاب العين لو تفقد نظرها



والحبيب اللي صدوده مثل مداته جزيله
صد عني واعرفه لو صد عن حاجه هجرها



كن روحي يوم حست في جفاه وصعب نيله
بشرتني بالضياع وشدة العزم لسفرها



ما رحمها من هلاك وما تقبّلها دخيله
تحتضر قدام عينه لين ماتت من قهرها



عاد ليت اللي ذبحها وارهب الموت بوسيله
ما دفن وجه الضحيه والسكاكين بنحرها



ليت قلبه يوم سوى فعلته كمّل جميله
لو غسلها من عروقه وبكفن صدره قبرها



من حفر بضلوع قلبه حفرةٍ تكفي قتيله
ليه ما يدفن قتيله بالضلوع اللي حفرها؟



اشتكيته للرفوف وللبراويز الهزيله
وانذعرت من النياح اللي سمعته في صورها



رحت اسولف للجبال الصم عن قصة رحيله
ما تركت متونها الا ينحت الدمع بصخرها



واحدٍ حقق جماله كذب اساطير الف ليله
يسكن السبع البحور ويحبس الحور بدررها



الدروب بكبرياها ترتجف تحته ذليله
والورود اللي تقبّل خطوته تنبت بأثرها



والغصون اليا بغاها تنثني له.تنثني له
والفياض ان حب ينثر عطرها يلمس زهرها



لو يصوّت للغدير المنجرف جفف سبيله
وان تبسّم للجبال الصامته نطّق حجرها



كل حاجه تستوي له. لي بغاها تستوي له
بالنظر واستغفر الله لو بقول : انه سحرها



ذاك لو بس يتمنا فاكهة شجرة ضليله
بس يفتح راحت ايده ويتساقط له ثمرها !



كن ربي سخر له المعجزات المستحيله
واصبح اسطوره وكل الالسنه تنقل خبرها



هان محجر دمع عيني لين جفّف سلسبيله
والتفت لأخير دمعه قبّلت يده ونثرها



دمعةٍ كن بشقاها يوم طاحت في شليله
جادلٍ جات بدويٍ تطلب الستر وسترها



له علي انه ليا من طاح من عيني تشيله
ولي عليه انه يرجّع لابتساماتي ثغرها



لو طعوني بالسكاكين بيده تشفي غليله
لاشتريها من عذابي وادفع بدمي مهرها



واطلبه ينهال فيني طعن لين يطيح حيله
بس لا يترك عيوني تنحرم نعمة بصرها



له بعيني مثل ما للطهر بالنفس الاصيله
تقطع يدين الردا لو مس شعره من شعرها



مابغيته غير دربٍ شتّت اقدام الدليله
مزنةٍ ما بللتني واستحيت اطلب مطرها



والعطايا من يدين الخلق للطالب قليله
والوهايب من يد الله للعباد اجل وأرها



وان نسيت اني زرعت العشق وحظوظي بخيله
ما نسيت ان العطايا تستحق اللي شكرها



صعب تلقى شخص وافي يجزي الطيب بمثيله
والعرب كد قالت ان : الناس ما تترك قشرها







الدنيا بخير

الظلام اليا تبرى من مدرات النهار
يبتدي عمره ضرير وينتهي عمره ضرير
والعيون اليا عماها حقدها تبقى صغار
ماتهادي مستواها غير للعقل الصغير
والدروب اللي نهاية وصلها ذاك المسار
ماتساوت مع طموحات الفهيم المستنير
من يميز في طريق الشر حسن الاختيار
من صرخ في كل قلب مظلم بصوت النذير
من قدر ياخذ بحق التايه الضايع قرار
من دفع عمره لحب الناس لو يبقي فقير
من يقيد لكل فزعه للندم همسة شرار
من يطفي بالقلوب المدمنة نار السعير
من خلقنا ماعهدنا غير حب الافتخار
نملك الصبر الكبير ونعشق الدرب العسير
همنا نرفع بلدنا مع صفوف الازدهار
ونتذكر يوم كان ترابها فرش وحصير
وللاسف عشنا وشفنا حرب درب الانحدار
حرب تشتيت القلوب وحرب تأنيب الضمير
حرب اقسى من حروب النار وحروب الدمار
حرب ابشع من نزيف الدم وبالسيف الشطير
بالسموم اللي تروج بالكويت بكل دار
السموم اللي تردوا من سبايبها كثير
والشباب اللي تمادوا في دروب الانتحار
اصبحوا فيها رهينة لعنة السم الحقير
يستغيثون بعمار النفس من نسف العمار
يرتجون وداع ظلما الليل للصبح المنير
صرخة المدمن تهيم وترتجي رفع الستار
رددت عند الهدف كلمة يصير أو مايصير
أشعلت بين الضلوع العوج بعد النور نار
وأدمعت كل العيون المشفقة دمع غزير
وامتلت كل الحناجر من صدى الصرخة مرار
وارتوت كل القلوب الضامية من زمهرير
آفة الإدمان زادت وابتدت بالانتشار
والوجوب إنا نحدد في تلاحمنا مصير
ناخذ اطراف القضية في عيون الاعتبار
ونرسم دروب النجاة وخطة الفوز الكبير
ونرسم خطانا وتكفي دمعة المدمن شعار
ويكفي إنا من ربوع المجد وأخوان الاسير
إن نوينا ما بغينا غير حرب وانتصار
وان ضمينا ما رضينا غير نروى من غدير
إتحدنا قلب واحد للهدب والاختيار
والفضل يرجع لربي ثم يرجع للامير
وعلموا من يفقد احساس الامل بالانتظار
الهدف لازال حي وتوها (الدنيا بخير)





الثريا

ليه تطعني وانا ميت بليا
ماكفاك الي حصلّي قبل ساعه

كن بين همومي وبينك حميا
جيتكم واحد وجيتوني جماعه

انت منا والمصايب من هنيا
كلكم ضدي ترى ماهي شجاعه

ما ابشع من جروح طعنات القفيا
غير سكينٍ تصيب بهالبشاعه

لاتتوب ولاتذوب ولا تريا
جرحها جرح وفظاعتها فظاعه

ترتوي من فيض دمي والتفيا
وصار قلبي مثل اخوها بالرضاعه

وانت ليل لو ضويته مايضيّا
ضعت فيه وشفت نفسي في ضياعه

اتهيا وين ما اشوفه تهيا
وارسي بمرساه وشراعي شراعه

من عرفته والمحيا بالمحيا
ومايروح الا ذراعي في ذراعه

ان رضيت ارضيه وان عييت عيا
وان طلبني قلت له سمع وطاعه

ما عشقت من النجوم إلا ((الثريا))
وماملكت من الكنوز إلا القناعه

وانت وجيوش الموادع والجفيا
كيف اوقف ضدكم وانتم جماعه

لوبجيكم بالشجاعه والحميا
البلا ان الكثره تغلب الشجاعه





يتبع


7
مع حامد زيد وعذ الكلام

واحب اشكر اخي وشاعرنا الغالي امرؤ القيس

على كتاباته ومشاركاته في موسوعه منتديات العيسويه ما قصرة

مشرفة موسوعة منتديات العيسويه>> همس الليل