السلام عليكم ورحمة الله وبركاته
اخوتي واخواتي .. انا اشتركت بالمنتدى لما قرأت عن هادا القسم ...
لأنو بجد بحاجه لحد يساعدني بمشكلتي
انا طالبة جامعيه ..علاقتي ممتازه مع الكل من صبايا وشباب
بيوم.. في زميل الي بالجامعه وبنفس التخصص كمان طلب مني الميموري فلاش تبعتي ينقل عليها ملفات الو ... اعطيتو اياها لمدة نص ساعه ورجعلي اياها ....
وراحت الايام
وبعد تقريبا شهر في معلومات كانت عندي ع الفلاش ميموري وبالغلط محيتها ... ف جبت برنامج برجع المعلومات اللي انمحت كلها عن الميموري ...
ورجعت كل المعلومات اللي كنت مخزنتها ومن ضمنها الاشياء اللي كان مخزنها هادا الشب ...
وكان في صور الو مع صبايا و....و...و....
زميلي هادا على علاقه مع صاحبتي (بحكم المخطوبين تقريبا...اهلهم على علم بالموضوع وعم ينتظرو يخلصو السنه هاي منشان الخطبه )
وانا لما شفت الصور.....بصراحه ما قدرت اتحكم باعصابي ... ف رحت سألت صاحبتي شو ؟كيف علاقتك معو هاي الايام؟؟قالتلي انو في بيناتهم مشاكل وشكلهم ح يتركو لانو هوه مش واضح معها وبتشك بتصرفاتو....
وقتها حكيتلها عن الصور اللي لقيتها... ووعدتني انها ما تجيبلو سيرة انها عرفت عن طريقي ...لأنو زميلي بنفس التخصص علاقتي فيه ممتازه وفوق هادا كلو مشروع التخرج تبعي ح يكون معو يعني ح يبقى معي سنه كامله وح اضل اشتغل معو طول السنه ... فما بدي يكون في بيناتنا حزازيات...
المهم حكت معو بخصوص الصور وكبرت المشكله بيناتهم وبطريقه او بأخرى وحكتلو انها عرفت بخصوص الصور عن طريقي ..وحكتلو انو انا ما الي علاقه وانو ما يبينلي انو عرف وانو ما يغير اسلوبو معي والخ الخ الخ.
وبعدها قطعت علاقتها فيه ....
المشكله ... علاقتي بالشب هادا ك زميل كانت ممتاااااااازه .... زميل خدوم جدا ومشروعي التخرج معو ..ز وما عندي اي مأخذ ع اخلاقو او على تصرفاتو مع اي شب او صبيه عنا بالجامعه
بس هلأ حاسه انو انا بعملتي هاي خنتو او عملتلو مشكله مع انو ما عمل معي الا كل خير
بس البنت صاحبتي وما قدرت اسكت ع اللي شفتو...
حاليا بتصرف معو وكأنوا ما في شي صار... وهوه بحاول يتعامل معي بشكل طبيعي (بس طبعا مش زابطه معو)
بيني وبين حالي مش ندمانه ....لانو غلط ومن حقي انبه صديقتي ....
وللحظه حسيت انو انا نبهت صديقتي وهيه دبحتني لما حكتلو اني انا اللي حكيتلها ...
وندمانه لاني خربت علاقتي بشخص بحياتو ما قدملي الا كل خير
مش عارفه شو اعمل... صديقتي من يومها وانا مخففه علاقتي فيها ..لاني حاسه اني ساعدتها وهيه اذتني كتييييييييير
وزميلي ...علاقتي فيه تمثيل بتمثيل .... انا بمثل انو ما في شي ... وهوه نفس الشي ...بس انا تعبت ومش قادره استمر على هالحاله خصوصا انو ارتبطت بهادا الشب لاخر السنه منشان مشروعي التخرج
ساعدوني ....
مش قادره استمر بالتمثيل انو ما في شي لانو الوضع مش طبيعي
مش قادره اناقشو بالموضوع لانو ما في بيناتنا كلام خاص (بغير موضوع الدراسه)
مش قادؤه ابتعد عنو حاليا منشان مشروعي التخرج
بترجاكم تلاقولي حل
|