لا لشركة الاتصالات الفلسطينية | No 4 PalTel

[لسعة شقاوة]

الاتصالات والحرب والخيار والفقوس

كلنا عشنا فترة الحرب، وطالما انك قاعد بتقرا هالموضوع، بتكون الحمد لله طلعت بسلام من الحرب.
في الحرب زي ما بنتذكر انه ما كان في كهربا، وأقل شي قعدنا شهر بدون ما نشوفها، يعني محدش منا خلال هالشهر فتح انترنت، ولو حتى اجت الكهربا ساعة ولا ساعتين في اليوم، أكيد كان في الأهم من الإنترنت والتنتيت وقتها.
وبعد ما انتهت الحرب ورجعت الميا لمجاريها، كنا بنتوقع من شركة الاتصالات انها توقف بجانب المواطن وتاخد بعين الاعتبار المعاناه اللي كان بعانيها فترة الحرب، وخاصة وانها اتعرضت متل ما اتعرض الشعب لقصف وتدمير معداتها، واستشهاد عدد من موظفيها وهم في مكان عملهم، كنا بنتوقع تاخد كل هالظروف بعين الإعتبار، بس وجدنا انه الاتصالات حاسبة شهر الحرب متل ما هو، ما في خصم ولا شيكل لا على التليفون ولا الانترنت، طيب التليفون وكان شغال وفش مشكلة، طيب الانترنت اللي ما استخدمناه ليش ينحسب علينا، عالقليلة لو ما انخصم كله، ينخصم نص الشهر.
طيب سؤال، ليش شهر الحرب انخصم عن ناس تانية؟
آه..!! تستغربوش، في ناس انخصم الشهر عنهم بالكامل، يعني في خيار وفقوس عند شركة الاتصالات.
اتصلت في شركة حضارة وسألتهم عن الموضوع، جاوبني موظف الدعم الفني انه اللي بقدم اعتراض بنظروا في موضوعه وبعملوله خصم.
يعني عشان تاخد خصم لازم تروح تردحلهم في الشركة وتعمللهم مشاكل، أما لو رحت ودفعت وانت محترم، بتاخدش خصم، بتاخد على قفاك، وبتضلك مروح.
طيب ليش شركة الاتصالات ما تعمل خصم لكل الناس، وخاصة انه كل قطاع غزة كان تحت الحرب مش ناس آه وناس لأ.
بنطالب شركة الاتصالات بمعاملة كل المشتركين معاملة واحدة وخاصة وإنا كنا تحت نفس الظروف، وعشنا نفس المعاناه اللي عاشوها الناس اللي قدمولهم الخصم.

الاتصالات وبطء الإنترنت بغزة

هادة أول موضوع بكتبه هنا وبداية قبل ما أحكي أي شي بحب أذكر في دور شركة الإتصالات الفلسطينية في بناء الاقتصاد الفلسطيني وكيف انها قامت بنقلة نوعية في تكنولوجيا الاتصالات في فلسطين، ووفرت على الناس كتير وقت وكتير جهد وقدمتلنا خدمات كتير رائعة، بس إلنا بعض الملاحظات على الشركة وعلى الخدمات وعلى الأسعار حابين نناقشها سوا.
وأول شي راح نبدا مع المشكلة اللي بنواجهها هالأيام وهي مشكلة بطء سرعة الإنترنت وخاصة في قطاع غزة، وراح نسرد كل شي بالتفصيل كلام شركة الاتصالات، وكلامنا احنا بناء على رؤيتنا وداراستنا للمشكلة، بس يارب يفتح الموقع عندكم عشان تقدروا تشوفوا أنا شو كاتب
مش عارف من وين أبدا، الأفكار عندي كتير والكلام كتير، بدي اياكم تركزوا معي عشان تقدروا تفهموا وتستوعبوا الأفكار اللي راح أشرحها في أول موضوع.
نيجي نحلل المشكلة وشو سببها، حسب كلام شركة حضارة -اللي أنا مشترك معهم- انها مشكلة عامة على قطاع غزة، وهادي الحُجة بسمعها من أول ما اشتركت في الانترنت معهم، وكالعادة الشماعة اللي الكل بعلق مشاكله عليها هية اسرائيل، وانه عشان الإغلاق والحصار اسرائيل مانعة دخول المعدات عشان يسرع الإنترنت.
بدي أمسك النقطة هادي أول شي وأثبتلكم بالصور والبراهين عدم مصداقية شركة الاتصالات وشركة حضارة، وانه ما في مشكلة في الخطوط ولا مشكلة معدات ولا محتاجين أي شي لتسريع الانترنت.

بتاريخ 12-2-2009 قامت شركة الاتصالات بادخال مقاسم ومعدات لتصليح الدمار اللي لحق بشبكة الاتصالات في منطقة الشمال بعد الحرب على غزة، ومن ضمن المعدات اللي دخلت 10 آلاف بورت لتركيب خطوط انترنت جديدة في القطاع، يعني اللي قادر يدخل معدات ومقاسم وبورتات عشان يركب خطوط جديدة، بقدر يدخل المعدات اللي بحكوا عنها عشان يزودوا سرعة الانترنت، هادة لو كان أصلا في معدات لتسريع خطوط الإنترنت، واللي خلاني أفقد ويطير مخي هو تركيب 1500 خط انترنت جديد ابتداءاً من الأسبوع القادم، هادة لو لسة ما ركبوا أصلاً، طبعاً كل هادي الخطوط راح تركب أكيد على نفس سرعة الانترنت اللي بنعاني منها.
والصورة من موقع شركة الاتصالات بتبين المعدات اللي دخلت للشركة، واللي حابب يقرا خبر وصول المعدات يفوت هان.
نيجي نشوف مدى مصداقية كلام شركة الاتصالات بانه المشكلة على القطاع مشكلة عامة وانه في مشكلة في الخطوط اللي واصلة على القطاع.
منطقياً لو كان في مشكلة في الخطوط بينا وبين الضفة يبقى بكون في مشكلة بأي شي بمر عبر هادي الخطوط .. صح ؟
وعشان تعرفوا طريقة الربط بينا وبين الضفة هية خطوط ألياف ضوئية (فايبر أوبتيك) وهادة الخط بقدر ينقل 10 جيجا بايت/ثانية.
طيب نيجي نجرب نفتح موقع شركة الاتصالات واللي موجود على سيرفراتهم في الضفة الغربية، تعالوا نجرب سوا >> من هنا << بالله كيف السرعة؟ حريقة صح ؟ طيب ونفتح كمان موقع شركة حضارة >> من هنا << أكيد الواحد حس حاله في عالم تاني، وسرعة الانترنت خرافية.

طيب شو رأيكم نعمل داونلود من موقع منهم نشوف سرعة التحميل كام بتوصل .. مثلاً نيجي نحمل التقرير السنوي من شركة الاتصالات وحجم الملف 7 ميجا >> حمل من هنا <<
للي ما بده يحمل أنا حطيت برنت سكرين لسرعة التحميل عندي، مع العلم انا ماخد سرعة 1م، يعني المفروض سرعة التحميل عندي ما تزيد عن 128ك في الثانية، المفاجأة انه سرعة التحميل وصلت 174ك في الثانية، يعني أكتر من الحد الطبيعي.

طيب نيجي نجرب نحمل من موقع تاني عشان نشوف سرعة التحميل منه كام بتوصل، أنا بدي أجرب أحمل من موقع رابيدشير، لأنه عندي اشتراك عليه وبعطيني سرعة تحميل مفتوحة وخرافية، بس مع خطوط شركة الاتصالات طبعاً الموضو مختلف .. ومن الصورة بتشوفوا انه سرعة التحميل يدوب 7ك في الثانية، وأكيد انتوا مش محتاجين أحطلكم برنت سكرين لأنه كل واحد مجرب وشايف وعارف كيف سرعة التحميل وسرعة التصفح.
طيب بدنا نشوف هل المشكلة هادي على غزة بس ولا في الضفة كمان، سألنا اصحابنا والناس اللي بنعرفهم في الضفة كيف سرعة الإنترنت عندكم، حكوا انه ما في أحسن منها ولا أحلى منها، ومرتاحين ومبسوطين كتير.
من كل الكلام اللي فوق بنستنتج التالي:

• شركة الاتصالات قادرة تدخل معدات وأجهزة لغزة، وبالفعل دخلت مقاسم جديدة وبورتات لتركيب خطوط انترنت جديدة في غزة، يعني انها بتدخل بس المعدات اللي بصالحها وما بتدخل المعدات اللي بدها تسرع الإنترنت، هادة في حال كان في معدات أصلاً لتسريع الانترنت، لأنه خط الألياف الضوئية بينا وبين الضفة سليم، ولو كان فيه مشكلة كان صارت على كل المواقع وكل الخدمات بينا وبين الضفة سواء خطوط الهاتف أو الانترنت أو الجوال.

• 
  
• من الفحص الصغير اللي عملناه فوق لسرعة الإنترنت استنتجنا انه الخطوط بينا وبين الضفة ما فيها مشاكل، وسرعة الانترنت بينا وبين الضفة ممتازة، البطء فقط من ما بعد الضفة، يعني من الضفة للعالم، والبطء هادة مش على كل المشتركين، لأنه مشتركين الضفة ما بعانوا من بطء الانترنت، واللي بدللنا انه المشكلة فقط لسرعة الإنترنت اللي مخصصينا لقطاع غزة، يعني مثلاً مثلاً بدل ما يخصصوا لغزة سرعة 50 ميجا تتوزع على كل غزة، مخصصين بس 20 ميجا، ودبروا حالكم فيها.
  

بعد هيك لو حد من الاتصالات أو حضارة حكالكم انه المشكلة عامة ومشكلة من اسرائيل أو مشكلة معدات أكيد حتعرفوا كيف تردوا عليه.

وفي هادة الموضوع أثبتنا انه شركة الاتصالات همها تكسب وتزيد في مرابحها السنوية، ومش هاممها تحسن خدمتها اللي بتقدمها، وللعلم أرباح شركة الاتصالات السنة اللي فاتت بلغت 89 مليون دينار أردني، أي ما يعادل 127 مليون دولار أمريكي، ونازلة تمص من دم هالشعب الغلبان ومش معطياه حقه في الخدمة اللي بتقدمها إله، أنا ماخد مثلاً سرعة 1م وبدفع عليها 200 شيكل كل شهر وما بستفيد منها، وكل الناس نفس الشي.
هادي أول فكرة حبيت أوصللكم اياها، وراح أنزللكم مواضيع كتير بتثبت جشع وطمع واستغلال شركة الاتصالات للمواطنين، ولازم كلنا نوقف مع بعض للمطالبة بحقوقنا بخدمة بتساوي مبلغ الاشتراك اللي بندفعه للشركة.